Ракометарите на Металург утре продолжуваат со забрзаниот ритам на натпревари. Српскиот претставник Партизан ќе биде генерална проба за македонскиот вицепрвак пред саботното гостување кај Барселона.
Средбата Металург – Партизан ќе се одигра утре од 17 часот и 45 минути во СЦ „Борис Трајковски“ во рамките на 6.коло од СЕХА лигата, а во таборот на Металург очекуваат сигурна победа.
– Можеби претходниот исход со Нексе е добредојден за да се сфати дека без максимално залагање до крај не може секогаш да се победи. Многу е важен пристапот на сите кои ќе добијат шанса да настапат. Партизан е млада екипа со добра иднина и треба сериозно да се влезе на овој дуел, изјави тренерот Лино Червар на денешната прес-конференција.
И против „црно-белите“ Металург најверојатно нема да биде комплетен. Во тимот се враќаат Велко Марковски и Ацо Јоновски, но здравствени проблеми имаат Ванчо Димовски, Никола Марковски и Златко Мојсоски.
Голманот Раде Мијатовиќ кој беше еден од подобрите со Нексе, очекува сигурна победа против неговиот поранешен клуб и враќање на самодовербата пред гостувањето кај Каталонците во 3.коло од Лигата на шампионите.