Поради недостаток на снег и високи температури за овој период од годината, женскиот и машкиот слалом кои беа предвидени да се возат на 14 и 15 ноември во финскиот скијачки центар Леви се откажани.
– Не би било фер, ниту за натпреварувачите ниту за публиката, да ги организираме трките во неидеални услови. Имаме одлични машини за правење вештачки снег. Ако ни дозволуваа временските услови ќе ја подготвевме патеката, но тоа за жал не може да се направи во предвидените термини за трките од Светскиот куп, изјави Јане Пеконен од организацискиот одбор за трките во Леви.
Метеоролошкиот завод во Финска нема поволни прогнози за другиот викенд, а во моментов во делови од Финска температурите достигнуваат и до 20 степени што е несвојствено за ноември во оваа скандинавска држава.
Досега во новата сезона од Светскиот куп се одржаа само по еден велеслалом во женска и во машка конкуренција на 24 и 25 октомври во Зелден, Австрија.