Одбојкарската репрезентација на Македонија попладнево треба да стигне во Вроцлав каде од утре до недела ќе настапува на првиот квалификационен турнир за Европското првенство 2015 година. Нашата селекција синоќа со автобус од Скопје замина на далечното патување (околу 1.500 километри).
Во однос на претквалификациите кои нашите одбојкари ги завршија во недлата во Струмица има една промена во составот. Меѓу 12-те избраници на селекторот Жарко Ристоски е повратникот во репрезентацијата Јовица Симовски, кој поради клупски обврски сега се приклучува. Во составот го нема Александар Милков, кој се повлече од настапите од националниот дрес.
Македонија на првиот од двата турнира, утре во 1.коло ќе игра против Словенија. Во сабота противник ни е домаќинот Полска, а во недела ќе играме против Летонија.