Браќата Игор и Иван Карачиќ ќе играат еден против друг на утрешниот дуел во Брест меѓу домаќинот Мешков и македонскиот шампион Вардар. Ова е средба од регионалната ракометна СЕХА лига.
Браќата Карачиќ потекнуваат од Мостар. И двајцата играат на средната бековска позиција, постариот Иван(28) во Мешков Брест, помладиот Игор (25) во РК Вардар.
Но, интересно за нив е тоа што двајцата браќа Карачиќ освен што играат за две различни екипи тие ги бранат боите и на две различни репрезентации. Вардарецот Игор Карачиќ е дел од репрезентацијата на Хрватска, а неговиот брат Иван го носи дресот на репрезентацијата на Босна и Херцеговина.
Карачиќ против Карачиќ сезонава еднаш веќе играа еден против друг на дуелот меѓу Вардар и Мешков Брест на турнирот во Струга. На овој меч поуспешен беше помладиот од браќата, Игор Карачиќ, кој со Вардар славеше победа против Мешков Брест со 33:24.
– Нема некои посебни чувства на овие натпревари. Имаме одиграно многу натпревари еден против друг и веќе се навикнавме на тоа. Јас го почитувам Иван како играч, вели Игор Карачиќ во пресрет на претстојниот дуел против Мешков Брест.
Братски дуел на натпревар што го игра Вардар имаше и во 1. коло од Лигата на шампионите кога во Скопје еден против друг играа Филип (Вардар) и Кирил Лазаров (Барселона). Овој братски дуел заврши без победник.