Двајца навивачи на шкотскиот фудбалски клуб „Абердин“ се пренсени во болница на лекување, откако група од околу 50 Шкотланѓани, кои носеле ознаки на својот клуб, биле нападнати во стариот дел на Мостар.
Над 200 шкотски навивачи допатуваа во овој град во Босна и Херцеговина, за да ги бодрат играчите од „Абердин“ за реванш мечот на нивниот клуб со локалниот „Широки Бријег“ во претквалификациски натпревар за Европската лига.
Тешкиот инцидент се случил пред мостарскиот паб „Блек Дог“.
Група домашни „силеџии“ ги нападнале Шкотланѓанте и почнале да ги удираат со палици за безбол и со метални шипки.
Според објаснувањето на шкотските навивачи, нападот со ништо не бил испровоциран.
Интервенирала мостарската полиција, како и раководството на „Абердин“, чии претставници го посетиле местото на инцидентот и разговарале со навивачите.
Полицијата на Мостар, подоцна соопшти дека ги идентификувала напаѓачите, но не даде никакви други детали.
Во изјава на интернет, пабот „Блек Дог“ им се извини на Шкотланѓаните и изрази жалење за нападот врз нив, инсистирајќи дека тој е поврзан „само со фудбалското ривалство и со ништо друго“.
Во изјавата од пабот уште се вели дека никогаш досега, во Стариот град на Мостар, се нема случено ваков инцидент.