Шпанскиот тенисер Рафаел Надал најави отворање на својата академија во албанскиот град Драч.
Комплексот ќе се состои од 12 тениски игралишта и уште шест за падел.
Во присуство на албанскиот премиер Еди Рама, веста беше објавена за време на отворањето на хотелот на Надал во одморалиштето Коста Брава во Каталонија.
„Ми се допадна визијата на Албанија за промоција на спортот и неговите вредности. Сигурен сум дека проектот ќе биде успешен“, рече Надал.
Во оваа прилика говореше и Рама.
„Имаме голема привилегија, но и одговорност да соработуваме со ваков исклучителен спортист и човек. Ни кажаа дека е невозможно да ги донесеме неговите планови во Албанија, но успеавме. Стапивме во контакт со неговото семејство и луѓето кои ги водеа неговите тениски центри и добивме по е-пошта одговор дека соработката е можна“, рече Рама.