Австралискиот кошаркар Арон Бејнс, кој на минатогодишните Олимписки игри во Токио заработи мистериозна повреда поради која повторно мораше да научи да оди, целосно се опорави и сака да се врати во НБА, каде што игра од 2013 година.
Искусниот центар, висок 208 сантиметри, истрча од клупата на натпреварот од групната фаза против Италија и не се врати, а беше пронајден во соблекувалната раскрвавен и без свест. Кога се разбудил, не можел да оди. Не е познато дали несреќата е поврзана со падот на тренинг три дена претходно, кога тој удрил со главата и вратот на подот.
Се испостави дека внатрешното крварење му вршело притисок на ‘рбетниот мозок, но по неколкумесечна рехабилитација, која вклучуваше ризичен лет од Јапонија до Австралија со специјален медицински авион, тој целосно ги обнови сите моторички функции и се чувствува подготвен да се врати на највисоко ниво.
Сега 35-годишниот центар е во Лас Вегас, каде што огромното мнозинство НБА клубови играат во Летната лига и каде може да се докаже и да ја продолжи кариерата во најсилната лига на светот.
Бејнс пристигна во НБА во 2013 година од Олимпија Љубљана, а играше за Сан Антонио, Детроит, Бостон, Феникс и Торонто, со просек од 6,0 поени и 4,6 скока на 522 натпревари.
Извор: Топспорт