Македонскиот шампион и бранител на трофејот на Меѓународниот ракометен турнир „Струга 2014“ Металург, синоќа беше совладан од францускиот прволигаш Кретеј со 24:21 (11:11).
Екипата на Металург не успеа да се справи со одличната одбрана на Французите, каде настапува и македонскиот репрезентативен голман Борко Ристовски. Поголем дел од мечот помина во израмнета игра и резултат, а решавачкиот момент беше во 52-та минута кога екипата на Кретеј направи разлика од четири гола (21:17).
Ренато Вугринец со шест погодоци беше најпрецизен и прогласен за најдобар играч во тимот од Автокоманда, а во спротивниот табор најдобар беше Хуго Деша со постигнати 10 голови.
Во вториот натпревар одигран доцна синоќа руската екипа Санкт Петербург убедливо ја совлада Металопластика (Србија).
Вечер на распоредот се два натпревари, во првиот се среќаваат екипите на Азоти Пулави од Полска и Кретеј (19:00), а потоа силите ќе ги одмерат вицешампионите на Македонија и на Русија, Вардар и Санкт Петербург (20:45).