Македонските репрезентативци и играчи на шампионот Металург Намуче Мојсовски и Филип Миркуловски и во следните четири години ќе го носат дресот на тимот од населбата Автокоманда. По тој повод денеска беше одржана и прес конфренција, на која и претседателот на клубот Ристо Чокрев ги потпиша договорите со играчите.
– Чест ми е што сум тука и што уште 4 години ќе го носам дресот на Металург. Задоволен сум од резултатот оваа сезона и треба да се обидеме ова да го надградиме. Ова значи дека во „Автокоманда“ останувам до 2017 година – истакна Наумче Мојсовски, кој поради повреда ги пропушти последните неколку натпревари, но очекува да се врати за дербито со Вардар Про и да биде подготвен за настапите на репрезентацијата во јуни.
Филип Миркуловски веќе 10 сезони го носи дресот на Металург.
– Оваа сезона стигнавме до 1/4 финалето од Лигата на шампионите. Со клубот потпишав на четири години што значи дека тука и би ја завршил и кариерата. Добро е што во клубот доаѓаат голем број млади, кои сега имаат многу подобри услови од колку кога почнувавме ние.
Металург најави дека во тек се преговори и со уште двајца играчи од сегашниот состав Дамир Батиновиќ и Тихомир Додер.