Во таборот на одбојкарската репрезентација на Македонија се убедени дека претстојниот викенд ќе забележат две победи против Израел и со тоа ќе ги задржат шансите за пласман во полуфиналето на Европската лига.
Нашите одбојкари имаа неуспешен старт во ова натпреварување и со два пораза се вратија од гостувањето во Естонија.
– Со Естонија одигравме два различни натпревари. Забележливо беше дека од сет во сет ја подобрувавме играта, а на вториот дуел освоивме и еден сет. Треба да не радува што како поминува времето се подобруваме. Ако одиграме само 20% подобро од вториот меч со Естонците, тогаш сигурно против Израел ќе ги освоиме бодовите, изјави селекторот Жарко Ристоски на денешната прес-конференција.
Првата средба е в сабота од 20 часот и 15 минути, а в недела дуелот почнува во 17 часот и 30 минути. Двата натпревара се играат во СЦ „Борис Трајковски“.
Македонската репрезентација, по две одиграни кола се наоѓа на последното место во групата А.