Новата сезона во најсилната кошаркарска конкуренција на планетата, НБА, ќе почне на 30-ти октомври со големото дерби меѓу бранителот на титулата Мајами Хит и тимот на Бостон Селтикс.
Истата вечер ќе бидат одиграни уште два натпревара. Како што тоа знаат да го направат Американците, на самиот старт ги соочија Лос Анџелес Лејкерс со Далас, додека во Кливленд, Кавалирс ќе ги вгостат кошаркарите од главниот град, Вашингтон Визардс.
Два дена подоцна, на 2-ри ноември, првиот дуел во историјата на франшизата ќе го одигра тимот на Бруклин Нетс и тоа против градскиот ривал Њујорк Никс, но на свој паркет.
Репризата на годинашното големо НБА финале ќе се одигра на католичкиот Божик, кога Мајами на Флорида ќе ја пречека екипата на Оклахома Сити Тандер.
Следниот викенд на сите ѕвезди Ол-стар ќе биде одржан во Хјустон на 17-ти февруари, а регуларниот дел од НБА сезоната ќе заврши на 17-ти април 2013-та година.