Кошаркарскиот клуб Кожуф од Гевгелија учествуваше на традиционалниот кошаркарски турнир во Солун што го организираше Грчката судиска организација, на кој учествуваа уште неколку екипи од Грција меѓу кои и афирмираните ПАОК, Ираклис и Кавала.
Во првиот настап гевгеличани минимално со четири поени разлика го совладаа домакинот на турнирот Ираклис, а во вториот настап извојуваа голема победа над Кавала со 25 поени разлика. По настапот на турнирот, гевгелиски Кожуф на 25 септември уште еднаш ќе гостува во Солун каде ќе одигра пријателски напревар со ПАОК.
– Учеството на турнирот во Солун е добредојдено пред стартот на домашното првенство и БИБЛ лигата. Постигнавме две победи од кои посебно значајна е онаа против Кавала, екипа со која игравме во БИБЛ лигата. Нов предизвик за нас е претстојниот меч со ПАОК кој беше учесник на Меѓународниот кошаркарски турнир што се одржа кон крајот на август во Гевгелија, изјави претседателот на Кожуф, Томица Главчев.
Гевгелискиот прволигаш во домашното првенство ќе стартува на 12 октомври пртив Фени Индустри на домашен терен, а три дена подоцна во рамки на БИБЛ лигата ќе ја пречека екипата на Пеќ.