Со помош на публиката можеме да дојдеме до поволен резултат, против квалитетниот ривал. Ако ја повториме играта во одбраната од дуелот во Шпанија кога игравме цврсто и борбено, и ако одиграме во нападот трпеливо, дисциплинирано и агресивно, ќе може да се надеваме на успех, изјави Индира Кастратовиќ, тренерот на ЖРК Вардар на денешната прес-конференција во пресрет на мечот со Ларвик.
Според Кастратовиќ услов за добар резултат ќе биде способноста на „црвено-црните“ да ги спречат контрите на противничките кои се многу квалитетни и опасни. Таа тимот на норвешкиот претставник го спореди со ПСЖ и Барселона во машкиот ракомет.
За тренерот на „вардарки“ по исполнување на првата цел, а тоа е влез во групната фаза од Лигата на шампионите сега на ред е втората задача, а тоа е пласман во следната групна фаза.
Дали ќе се оствари оваа цел според Индира ќе зависи од следните три натпревари по дуелот со Ларвик, а тоа се двете средби со Подравка и реваншот со Бера Бера.
Натпреварот ЖРК Вардар – Ларвик е во рамките на 2.коло од Лигата на шампионите, ќе се одигра в петок во СЦ „Борис Трајковски“ во Скопје со почеток во 18 часот и 30 минути.