Јапонската асоцијација на производители на автомобили изрази надеж дека северноамериканските држави ќе се држат до политиката на ниски давачки и слободен пазар во трговијата со автомобили, додека ги договараат измените на трговскиот договор НАФТА.
САД, Канада и Мексико водат мачни преговори за иднината на НАФТА, еден од најголемите трговски договори во светот. Јапонија е голем извозник на автомобили во САД, а јапонските компании воедно се голем инвеститор во погони во САД, и се надеваат дека американскиот пазар и во иднина ќе остане отворен за нив. Американските власти најавија поголеми привилегии за компаниите кои произведуваат автомобили во САД, а отежнување на работата на увозниците.
– Увозните давачки треба да бидат ниски, а правилата за увоз треба да бидат насочени кон поттикнување на трговијата и транспарентноста, изјави Сеичи Нагацука, претставник на Јапонската асоцијација на производители на автомобили.
Околу една третина од производството на јапонските автомобилски компании завршува на американскиот пазар. Освен во Јапонија и САД, Тојота, Нисан и Хонда имаат производни погони во Мексико, користејќи ги поволностите што ги пружа НАФТА.