Холанѓанката Бибијан Ментел-Спе го освои златото во сноуборд крос на Зимските параолимписки игри во Пјонгчанг, а нејзината животна приказна покажува дека со доволно волја и упорност може да се постигне се.
Оваа 45-годишна Холанѓанка, на која пред неколку години и ја ампутирале ногата до коленото, само десет недели пред да го освои златото во Пјонгчанг била на операција поради рак на вратниот дел од рбетниот столб.
Возењето, кое и го донесе златниот медал, не предизвика толку внимание во јавноста, колку сето она што таа го преживеала изминатите девет месеци.
Драмата на параолимпијката, која и во Сочи триумфираше во сноукрос, почнала во јули. Лекарите тогаш и дијагностицирале рак и тоа по деветти пат во нејзиниот живот. Бибијан во 2002 година ја загубила потколеницата бидејќи тумурот ја нападнал коската, а овојпат во прашање биле вратните пршлени.
– Беше утврдено дека 40 отсто од шестиот вратен пршлен е зафатен со рак. Минатото лето направив 48 зрачења. Кога наводно излечена се вратив на рехабилитациските тренинзи се утврди дека пршленот скоро колабирал од ракот и радиолошката терапија. Тогаш ми рекоа дека рбетот би можел да ми се прекине на тоа место и да останам парализирана доколку не бидам оперирана веднаш, вели Ментел-Спе.
Таа набргу потоа имала две операции на вратниот пршлен.
– Едната беше крајот на декември, а другата на 3 јануари. Тогаш лекарите ми рекоа дека вратот ми е во ред и дека се надеваат оти ќе успеам да заминам на Параолимписките игри, истакна Холанѓанката.
Бибијан Ментел-Спе вели дека само пред три недели повторно застанала на сноуборд и затоа и е неверојатно што го освоила златото.