Македонскиот ракометен шампион Вардар во недела го игра натпреварот од 2.коло од Б групата од Лигата на шампионите. Во Скопје ќе гостува унгарската екипа ПИК Сегед, која исто како и Вардар во првото коло постигна победа.
На денешната прес конференција тренерот на „црвено-црните“ Раул Гонзалез истакна:
– Добро е што на првиот натпревар освоивме два бода. За ривал во следното коло го имаме ПИК Сегед кој е добра екипа која постигна победа над Киелце. Тоа е екипа која постојано водеше на тој дуел со 3-4 голови разлика. Сегед игра како екипа и затоа е тешко да се игра против нив. Добро трениравме оваа недела.
Во редовите на Вардар на повреди се жалат Лука Циндриќ и Игор Карачиќ, но Гонзалез очекува и двајцата да бидат подготвени за неделниот натпревар.
Голманот на Вардар, Арпад Штербик со 17 одбрани беше прогласен за голман на првото коло.
– Очекувам дека ќе играме тежок натпревар. ПИК Сегед е незгоден ривал, кој последните 2-3 години постојано го крева нивото на играта. Лани го елиминираа Рајн Некар Ловен и го победија Кил. Повеќе стравувам од овие дуели откаолку од Барселона, истакна Штербик.
Натпреварот Вардар – ПИК Сегед се игра во недела со почеток во 17:30 часот во СЦ „Јане Сандански“.