Новак Ѓоковиќ (39) во интервју за каталонскиот весник „Спорт“ откри кога планира да ја заврши својата импресивна кариера.
Освојувачот на рекордни 24 Грен слем титули и 40 Мастерс турнири ја комплетираше својата колекција на најголеми трофеи во 2024 година во Париз, кога го освои олимпиското злато. Ѓоковиќ истакна дека тоа е круната на неговата кариера.
На прашањето дали настапот на следните Олимписки игри во Лос Анџелес во 2028 година е сè уште цел или повеќе сон, Ѓоковиќ одговори:
„Мислам дека е и едното и другото. И сон и цел, но и желба. Во последните неколку години многупати сум рекол дека би сакал да стигнам до Олимписките игри во Лос Анџелес во 2028 година. Мислам дека можам да го остварам тоа. Ќе видиме. Тоа ќе зависи од тоа како ќе реагира моето тело и од многу други околности.
Денес не играм и не се натпреварувам на толку многу турнири, ниту приближно колку што го правев тоа во изминатите дваесет години. Одлучив да го направам тоа бидејќи сакам да поминувам повеќе време со семејството и навистина да се посветам на различните улоги што ги имам во животот – како сопруг, татко, син или брат – додека истовремено развивам и други работи што ме интересираат.
Се разбира, тенисот сè уште е во центарот на мојот професионален живот, но сакам да најдам рамнотежа и затоа го променив мојот распоред. Сепак, сè уште се надевам дека ќе можам да стигнам до следните Олимписки игри и да ја завршам кариерата со знамето на Србија на рамениците“.