Светскиот рекет број еден ја започна својата 310-та недела на врвот на АТП листата, со што го изедначи рекордот на сите времиња, кој го држеше швајцарскиот ас и негов голем ривал, Роџер Федерер.
Идниот понеделник, на 8 март, српскиот шампион и официјално ќе стане тенисерот со најмногу недели поминати на врвот на рангирањето. Со неделата од 15 март, 312-тата, тој ќе наполни цели шест години на првото место.
Ѓоковиќ, кој во мај ќе наполни 34 години, за првпат се искачи на врвот на АТП листата на 4 јули 2011 година, кога беше на 24-годишна возраст.
Федерер се уште го држи веројатно недостижниот рекорд од 237 недели по ред на врвот на листата, додека најдолгата низа на Ѓоковиќ изнесува 122 недели.