Српскиот тенисер Новак Ѓоковиќ (6-ти АТП) го освои АТП турнирот во Женева откако во денешното финале беше подобар од Полјакот Хуберт Хуркач (31-ви АТП). Со тоа, Ѓоковиќ стигна до јубилејната 100-та титула во својата богата кариера.
Финалето траеше повеќе од три часа, а резултатот беше 5:7, 7:6, 7:6 за Ѓоковиќ.
На почетокот од натпреварот, Хуберт и Новак беа исклучително внимателни и квалитетни на своите сервиси, а победникот на првиот сет беше решен во 12-от гем кога Полјакот освои брејк што беше доволен за да поведе во овој натпревар.
Речиси идентично беше и во вториот сет, каде што Ѓоковиќ едноставно не можеше да добие брејк. И Хуркач немаше шанси на сервисот на Новак, па се играше тај-брејк, во кој српскиот тенисер се снајде подобро и стигна до нерешен резултат.
Хуркач добро го отвори третиот, одлучувачки сет и брзо поведе со 2:0 бидејќи доби брејк на првиот сервис на Ѓоковиќ. Сепак, Новак возврати во осмиот гем и израмни на 4:4. Тај-брејкот беше повторно одигран, и според добро пробаниот рецепт, Ѓоковиќ повторно се снајде подобро и оствари голема победа.
Ѓоковиќ ја освои 100-тата титула во кариерата, што само дополнително потврди дека е најдобриот тенисер на сите времиња.