Десното крило на Металург и на македонската репрезентација, Гоце Георгиевски, потпиша нов договор со Металург.
– Георгиевски е вистински производ на нашиот клуб и во Металург ги помина сите старосни категории, почнувајки од нашата школа во Скопје, преку пионерската, кадетската и младинската екипа. Својата љубов кон клубот Георгиевски ја потврди со потпишување на нов, тригодишен договор, соопштија од таборот на македонскиот ракометен шампион.
Задоволство од новиот договор искажа и Георгиевски.
– Со Металург сум емотивно поврзан, бидејки целокупната моја ракометна кариера помина на паркетот во „Автокоманда“. Пресреќен сум што бев дел од најголемите успеси на мојот клуб и со нетрпение ги очекувам следните предизвици. Потпишав тригодишен договор и ќе сторам се за да ја оправдам довербата, вели крилниот играч на металурзите.