Олимпијакос е првиот тим кој обезбеди пласман во финалето на кошаркарската Евролига.
Во првиот меч од полуфиналето на завршниот „Фајнал-фор’’ турнир што годинава се одржува во Мадрид, кошаркарите на Олимпијакос минимално со 70:68 ја совладаа екипата на ЦСКА Москва и се изборија за големото финале.
Во неизвесниот финиш клучниот момент се случи на седум секунди пред крајот, при нерешен резултат, кога Василис Спанулис постигна „тројка“.
Спанулис средбата ја заврши со 13 поени од кои три „тројки“ во исто толку обиди во последниот период, додека Јоргос Принтезис постигна поени повеќе (14).
За Олимпијакос ова е третото финале во последните четири сезони.
Кој ќе биде противник на Олимпијакос во финале во недела, ќе биде познато вечерва, откако во вториот полуфинален натпревар ќе играат домашниот Реал Мадрид и турската екипа Фенербахче.
Овој меч ќе започне во терминот од 21 часот.