Поранешниот прославен српски фудбалер и југословенски репрезентативец Драган Стојковиќ – Пикси денеска официјално е назначен за нов селектор на Србија.
Пикси потпиша тригодишен договор со Фудбалската федерација на Србија и треба да остане на селекторското место до завршување на квалификациите за Европското првенство во 2024 година.
Тој доаѓа на местото на Славиша Тумбаковиќ, кој во декември поднесе оставка како селектор на Србија, откако не успеа да обезбеди пласман на претстојното Европско првенство.
Драган Стојковиќ – Пикси својата фудбалска кариера ја започна во Раднички Ниш, по што со голем успех го носеше и дресот Црвена ѕвезда и Олимпик Марсеј.
Во тренерската кариера што ја започна во 2008 година, новиот српски селектор предводеше само две азиски екипи – јапонската Нагоја и кинескиот Гвангжу.