Војската на Црна Гора синоќа од морето на устието на реката Бојана, кај Улцињ, спасила двајца странски државјани, од кои едниот е хрватскиот скијач Ивица Костелиќ, потврдија за медиумите црногорската влада.
Потврдено е дека Костелиќ и уште еден странски државјанин биле спасени „во сложени околности“ со употреба на патролни чамци за брза интервенција на Воената морнарица на Војската на Црна Гора и хеликоптерска поддршка од воздух.
Според пишувањата на медиумите, Костелиќ и уште едно лице биле на кајак, но силен јужен ветер и бранови високи над три метри ги превртел и ги одвлекол од брегот.
Како што дознава „Вијести“, двајцата спасени се добро, но превентивно се предадени на екипа на Брза помош која ги чекала во пристаништето Бар, каде околу 22.45 часот запловил патролниот брод.
Костелиќ официјално се повлече од професионалното скијање во 2017 година. Тој е најуспешниот алпски скијач во хрватската историја.
Тој го освои Светскиот куп во сезоната 2010/2011. и победи вкупно 26 пати во поединечни трки. Има четири сребрени медали од Зимските олимписки игри. По завршувањето на професионалната кариера се посвети на едрење и авантуристички спортови.