Хрватската полиција во раните утрински часови влегла во куќите на извршниот претседател на Динамо Загреб, Здравко Мамиќ и неговиот брат Зоран Мамиќ кој ја извршува тренерската функција во хрватскиот шампион. Браќата, според хрватските медиуми, се сомничат за даночно затајување.
Осомничените не се во Загреб, туку се наоѓаат во Словенија каде Динамо се подготвува за новата сезона и треба да одигра контролен дуел со македонскиот шампион Вардар.
– Ние сме подготвени за соработка со сите институции, но жалиме што ова се случи во време кога се наоѓаме на подготовки во странство и малку ни е чудно што постапката почнува баш сега. Ги отфрламе сите обвинение што се кон нашиот клуб и раководството и ќе докажеме дека сме неоправдано осомничени, соопштија од Динамо.
Здравко Мамиќ подолго време е на удар кај поголемиот дел од навивачите на Динамо кои од него повеќепати бараа оставка и ги бојкотираа натпреварите на нивните миленици.