Самуел Умтити (29) го раскина договорот со Барселона, соопшти шпанскиот гигант. Каталонскиот клуб долго време се обидуваше да се ослободи од него бидејќи договорот му важеше уште три години и имаше голема плата, а Барселона која не сметаше на него мораше да ги намали издвојувањата за плати поради тешката финансиска состојба.
Иако деталите за раскинувањето на договорот не се објавени, каталонски „Спорт“ смета дека Умтити одлучил на Барселона да и ја прости целата или дел од платата што требаше да ја добива во следните три сезони. Наводно се работи за околу 20 милиони евра годишно. Иако тренерот Чави Ернандез не сметал на него, Умтити наводно бил еден од најплатените играчи на Барселона, пишуваат каталонските медиуми.
Да потсетиме, Умтити минатата сезона ја мина на позајмица во италијански Лече, каде по неколку години одигра одлична сезона. Тој дојде во Барселона во 2016 година за 25 милиони евра од Лион. Вкупно за шпанскиот шампион забележа 133 настапи, но често го мачеа повреди поради кои паѓаше од форма, односно никогаш не можеше да влезе во совршена состојба.
Според Transfermarkt неговата вредност е четири милиони евра. Не се знае каде ќе ја продолжи кариерата, но се споменуваше враќање во Лион.