Раководството на Африканската фудбалска федерација (ЦАФ) сметаат дека африканските земји главно ќе гласаат за актуелниот претседател на Меѓународната фудбалска федерација (ФИФА) Сеп Блатер на изборите во мај.
– Африка цврсто стои со Блатер. Тој е многу популарен на континентот, изјави претседателот на Фудбалската федерација на Гана и член на Извршниот комитет на ЦАФ Квеси Њантаки.
Блатер во трката за неговиот петти мандат на чело на ФИФА ќе има четири конкуренти – претседателот на Холандската федерација Мајкл Ван Прага, јорданскиот принц Али бин Ал Хусеин, Французинот Жером Шампањ како и поранешен француски фудбалер Давид Жинола кој објави кандидатура, но досега не ја добил потребната поддршка од најмалку пет земји-членки на ФИФА.
Од вкупно 209 земји-членки на ФИФА, 53 се од Африка.