Меѓу три и шест отсто од населението во Грција страда од депресивни состојби. Таа цифра кај жените е двојно поголема, објави весникот Етнос.
Статистиката покажува дека возраста на која почнува заболувањето, е меѓу 20 и 30 години. Депресијата обично „погодува“ лица на возраст меѓу 50 и 60 години. Веројатноста за таква состојба кај луѓето е 20 отсто.
Силен стрес, со појави на паника, имаат околу еден до два отсто од жителлите во Грција. Во изминатите десет години препишувањето антидепресиви двојно е зголемено, наведува весникот.
Според професор по психијатрија на Солунскиот универзитет „Аристотел“ не може да се прави врска меѓу кризата и растот на психичките заболувања во државата. Константинос Фудулакис наведува дека националниот здравствен систем нема ресурси да се справи со тој проблем бидејќи финансисрањето е оскудно, недостигаат лекарства, а некои клиники се затвораат.
Наскоро ќе имаме раст на луѓето со сериозен процент на инвалидитет заради лоша терапија, наведува Фудулакис.
Според истражување во Солун, кај бездомници, невработени и семејства со еден родител, процентот на луѓе кои страдаат од депресија е петпати повисок. Кај нив е зголемена склоноста за самоубиство.
Економската криза и несигурноста на пазарот на трудот водат се повеќе луѓе од Европа до состојба на депресија, посочува весникот. Според европската Асоцијација за лекување депресивни состојби еден од 10 вработени во Европа не оди на работа поради психички проблеми. Во криза, тој губи во просек по 36 работни денови.
Во 2010 година депресивните растројства ја чинеле ЕУ, 92 милијарди евра.