Србија ќе продолжи со политиката на регионалната соработка на Западен Балкан, бидејќи целиот регион треба да напредува на патот кон европските интеграции, изјави денеска српскиот претседател Александар Вучиќ на средбата во Белград со генералната секретарка на Регионалниот совет за соработка (РЦЦ), Мајлинда Брегу.
За време на првата службена посета на Брегу на Србија, како што соопшти РЦЦ, станало збор за важноста на „повеќегодишниот акциски план за регионален економски простор“, што го договорија премиерите на земјите од Западен Балкан на Самитот во Трст во 2017 година.
Со планот се предвидува поголема мобилност и повеќе инвестиции во регионот, како и нов регионален договор што ќе доведе до укинување на роамингот во 2021 година.
„Во наш заеднички интерес е да напредуваме како регион кој јасно зборува меѓу себе дека сме потребни едни на други. Најефикасен пристап кон интерацијата на Западен Балкан е да се продолжи со работата на мобилноста, нулта тарифите во роамингот, трговијата и инвестициите, се заедно насочено кон воспоставување на заеднички економски регионален простор“, изјави Брегу.