Директорката на Управата за статистика на Црна Гора, Гордана Радојевиќ изјави дека во Црна Гора постои голем проблем со неактивност на населението, бидејќи секој втор невработен не сака да работи и не бара работа.
Покрај стапката на невработеност која изнесува 14,1 отсто, Радојевиќ тврди дека повеќе загрижува податокот што во просек во Црна Гора неактивни се 45 проценти од популацијата од 15 до 64 годишна возраст.
Дел од населението не работи и не бара работа, односно да им се понуди работа не би ја прифатиле, вели таа.
-Секако дека одреден процент на неактивност е неизбежен, особено за младата популација која студира, се усовршува. Меѓутоа, и покрај тоа, Црна Гора е земја со највисока стапка на неајтивност во ЕУ и пошироко, изјави Радојевиќ.
Сепак, како што оцени, економскиот раст за кој говорат претставниците на власта во земјата навистина се чувствува, а во прилог на тоа сведочи европската статистика.