Пациент на 51-годишна возраст почина од „свински грип“ во Клиничкиот центар во Подгорица, јавија црногорските медиуми.
Нема податоци дали пациентот боледувал од хронични болести, но тој не бил вакциниран против грип, се наведува на сајтот на Институтот за јавно здравје на Црна Гора.
Ова е првиот регистриран смртен случај во оваа сезона, во која е докажано присуство на вирусот од типот Х1Н1, кој е познат како „свински грип“.
Како што пренесе БТА, минатата недела во Црна Гора е регистриран пораст на бројот на заболени.
До пред два дена во Центарот за медицинска микробиологија при Институтот за јавно здравје е потврдено заболувење од свински грип кај 16 пациенти.
Од 8 до 14 февруари се регистрирани 70 заболени, од кои поголемиот дел се на возраст меѓу 25 и 64 години.