Советот за надворешни работи на Европската унија го назначи денеска Ларс Гунар Вигемарк за специјален претставник на ЕУ за Босна и Херцеговина.
Вигемарк исто така ќе ја преземе функцијата шеф на Делегацијата на ЕУ во БиХ.
Ларс Гунар Вигемарк во моментов е шеф на Делегацијата на Унијата во Пакистан и има повеќе од 30-годишно искуство во шведските и европските дипломатски служби.
Работел во повеќе дипломатски мисии, вклучувајќи ги и тие во Москва и Вашингтон, а беше и шеф на Единицата за безбедносна политика во Европската комисија.
На должноста во БиХ, која ќе ја преземе на 1 март, Вигемарк го наследува Петер Соренсен, кој оваа функција ја извршуваше од 1 септември 2011 година.
– Искуството на господинот Вигемарк ќе претставува важен придонес за нашиот ангажман во БиХ, како и за надворешните работи на ЕУ, изјави високиот претставник на Унијата за надворешна политика и безбедност, Федерика Могерини.