Предраг Пантиќ, синот на уапсениот Дејан Пантиќ, испратил молба до сите, да му бидат доставени лекови на неговиот татко и да му се дозволи на неговото семејство да се слушне со него.
„Само нека му бидат доставени лековите затоа што е сериозен пациент со срцева слабост. Има проблеми со притисок, пред неколку месеци му беше вграден стент. Бараме да прими терапија“, апелира Предраг Пантиќ во видео пораката.
Тој истакна дека не знаат ништо за него, дали е добро, ниту каде е, а камоли дали прима некаква терапија. Според него, адвокатот го видел неговиот татко на првото соочување преку видео врска и тој не изгледал најдобро.
На Дејан Пантиќ, поранешниот полицаец кој пред неколку дена беше уапсен на преминот Јариње, вчера му е одредена мерка притвор до 30 дена. Одлуката на судијата од Приштина дојде без образложение.