Косовските власти побараа НАТО да го транспортира поранешниот српски полицаец Дејан Пантиќ, кој беше уапсен пред две недели во Јариње.
Министерот Џељаљ Свечља вчера изјави дека не можат да го префрлат Пантиќ во притворското одделение, бидејќи локалните Срби подигнале барикади за да го спречат неговото префрлање, потсетува Ројтерс.
– Пантиќ треба да биде во притвор, а не во полициска станица и за тоа побаравме од нашите меѓународни партнери да го префрлат во соодветна установа – рече Свечља.
Според Ројтерс, мисијата на НАТО на Косово – КФОР, е единствената сила која располага со хеликоптери. Приштина не ги поседува.
– КФОР во последните неколку дена веќе превезе девет полицајци, кои не можеа да ја напуштат областа бидејќи патиштата беа блокирани – пишува Ројтерс.
Репортерот додава дека косовските институции вчера предупредија дека барикадите ќе бидат отстранети доколку КФОР не го стори тоа.