Хрватска и натаму се бори со големите поплави што поради обилните врнежи зафатија делови од земјата. Населението во погодените региони е предупредено дека врвот на ситуацијата со врнежите се очекува денеска, а ситуацијата ќе ја влоши и водениот бран кој се очекува од Словенија.
Откако за само 24 часа наврнаа 250 литри на метар квадратен, водостојот на реката Зрмања во Обровац достигна историски 302 сантиметри, што е дури 39 сантиметри над највисокиот водостој на Зрмања измерен во тој град. Тешка е ситуацијата и во Грачац. Вчера најкритично беше во Хрватска Костајница каде беше прогласена вонредна состојба, а реката Уна расте од час во час.
Борбата со поплавите се води и во Карловачкиот регион. Според проценките, максималните водостои на реката Купа во Карловац се очекуваат во текот на вечерта, а утринава беа измерени 826 сантиметри, што е 4 сантиметри под прагот за прогласување вонредна состојба. Реката Корана веќе се излеа од коритото.