Претседателите на неколку турски адвокатски асоцијации од различни градови протестираа денес во близина на Анкара откако полицијата го блокираше автопатот и ги спречи да стигнат до главниот град, јавуваат агенциите.
Адвокатите тргнаа пеш од различни градови кон Анкара минатата недела, во знак на протест против владините планови за измена на законот што ја регулира работата на адвокатите и нивните здруженија, вклучително и начинот на кој тие избираат претседатели на регионални здруженија.
Адвокатите велат дека измените се насочени кон намалување на бројот на здруженија, чии членови во голем дел се остри критичари на Владата на Реџеп Таип Ердоган.
Полицијата ја блокираше групата на главниот автопат што води кон градот, а имаше и краток судир меѓу адвокатите и полицајците.