Турција денеска ги негираше тврдењата дека џихадистите од Исламска држава во сирискиот град Кобане влегле преку турската граница.
Во овој самоубиствен напад (експлозија на автомобил-бомба) погинаа пет лица, соопшти Рами Абдел Рахман, директор на сирискиот Центар за мониторинг на човековите права.
Според некои извештаи, четири автомобили на припадници на ИД го минале граничниот премин со Турција, Мурситпинар, и се упатиле понатаму кон Кобане, што Турција најостро го негира, пренесуваат француските медиуми.
„Податоците со кои располагаме докажуваат дека припадниците на ИД се уфрлиле во Кобане од сириското место Јараблуса“, соопшти канцеларијата на гувернерот на пограничниот турски регион Санлиурфа.
Неименуван турски официјален претставник за француските медиуми изјави:„имаме конректни докази дека не дошле од турска страна“ и додаде дека наскоро ќе покажат и фотографии што тоа и го докажуваат.
Центарот за мониторинг на човековите права соопшти и дека борците на Исламска држава денеска во едно село јужно од Кобане извршиле егзекуција врз најмалку 20 сириски Курди, меѓу кои имало жени и деца.