Трите опозициски партии, Движењето Самоопределување, Алијанса за иднина на Косово и Иницијатива за Косово побараа денеска од претседателот на Уставниот суд на Косово, Енвер Хасани да поднесе оставка, бидејќи во „повеќе случаи го прекршил Уставот“.
Во заедничкото соопштение на трите партии е наведено дека кршењето на правилникот и уставноста од страна на Хасани довело до неуспех на Уставниот суд и флагрантно непочитување на законодавството.
– Судијата Хасани по овие случаи повеќе нема кредибилитет и не ужива доверба да може одговорно да ја извршува оваа функција. Случаите, во кои тврди дека е уценет, треба итно да се процесуираат до правосудните органи, се додава во соопштението.
Партиите наведуваат дека тоа се причините поради кои бараат оставка од актуелниот претседател на Уставниот суд, а како најнов пример го истакнуваат фалсификувањето на документи при изборот на меѓународни судии.