Бугарскиот министер за иновации и раст, Даниел Лорер, денеска имаше средба со турскиот министер за трговија, Мехмет Муш, за проширување на билатералната трговија и зголемување на инвестициите меѓу двете земји, соопшти прес-центарот на бугарското Министерство.
Како што јави дописникот на МИА од Софија, трговската размена меѓу Бугарија и Турција е во нагорен тренд, веќе надминувајќи го периодот од пред пандемијата во 2019 година. Трговијата меѓу двете земји за 2021 година изнесуваше 5,2 милијарди евра, што е зголемување од над 30 отсто во однос на 2020 година. Од нив, бугарскиот извоз изнесува 2,1 милијарди евра, што е зголемување од 18,7 отсто.
Инвестициите на турските компании во Бугарија достигнуваат околу 2,5 милијарди евра во различни сектори, како трговијата со стакло и порцелан, прехранбената индустрија, хемиската и текстилната индустрија.
Двајцата министри зборуваа за потенцијалот за соработка во производството на енергија и за можностите за соработка во зелените инвестиции и транзицијата кон обновливи извори на енергија.
Се разговараше и за можностите за потпишување нов Договор за поттикнување и заштита на инвестициите меѓу Бугарија и Турција, како и за зајакнување на соработката во областа на транспортната и енергетската инфраструктура, градежништвото, производството на делови и компоненти за автомобилската индустрија.
Лаурер и Муш го коментираа и растот на светските цени на челикот и цементот, како и можностите за соработка за обезбедување на потребните количини за бугарското производство.
Министерот Муш беше примен и од бугарскиот вицепремиер и министер за финансии Асен Василев, со кого, покрај трговските односи меѓу Софија и Анкара, разговараше и за транспортните проекти меѓу двете соседни земји.
Извор: МИА