Грција има потреба од долгорочна „национална стратегија“ со цел да се справи со приливот на мигранти без документи од Средниот Исток, Африка и Азија, изјави грчкиот премиер Алексис Ципрас по денешната средба со европскиот комесар за миграции, внатрешни работи и државјанство Димитрис Аврамопулос.
– Европската унија треба да покаже повеќе солидарност кон луѓето кои бегаат од воените зони, рече Ципрас и додаде дека исто така треба да има повеќе поддршка за земјите на надворешните граници на Европа, како што е Грција, во кои влегуваат повеќето мигранти.
Европската комисија е свесна за потребата од подобрување на сегашните прописи со кои илегални мигранти се враќаат и документираат од страна на државата на ЕУ во која влегле прво, рече Аврамопулос.
– Во моментов е широко прифатено дека нешто мора да се промени, рече еврокомесарот и додаде дека за таа цел ќе биде поднесен сеопфатен предлог.