Претседателот на Европскиот парламент, Мартин Шулц го предупреди грчкиот премиер Алексис Ципрас да не се издвојува од заедничкиот став на ЕУ кон Русија во врска со украинската криза.
Ципрас, лидер на радикалната левица СИРИЗА која победи на предвремените парламентарни избори во неделата, вчера ги вознемири европските партнери откако упати критика на соопштението од ЕУ, со кое Москва се предупредува за нови санкции поради нејзината улога во Украина.
Неговата одлука да го прими рускиот амбасадор пред да се сретне со кој било друг странски официјален претставник, исто така, не помина незабележано во Брисел и Берлин.
– Шокантно е што Грција се издвои од заедничката позиција на ЕУ во врска со Русија. Не може од една страна да бараш Европа да покаже солидарност со твојата земја, како што прави господинот Ципрас, а потоа првиот официјален чекор да ти биде „минирање“ на заедничкиот европски став, истакна Шулц.
Претседателот на ЕП денеска ќе се сретне со Ципрас во Атина, при што ќе се осврнат на програмата на новата Влада и како Грција планира да го реши проблемот со долгот.
– За време на средбата ќе му кажам дека секој едностран потег во надворешната политика нема да му помогне, нагласи Шулц.