Грчкиот борбен авион „Ф-16 блок 52“ денеска се урна во близина на островот Псатура во централниот дел на Егејското Море, а пилотот е спасен.
Пилотот успеал да го активира системот за исфрлање и паднал со падобран во морето.
Генералштабот на воздухопловните сили потврди дека едноседниот авион од базата за борбени авиони во Лариса, во централна Грција, полетал на тренинг лет во формација со други авиони и се урнал пред пладне.
Во акцијата за пребарување и спасување учествуваа хеликоптерот на воздухопловните сили „Супер Пума“, хеликоптерот С-70 на морнарицата и противпожарниот авион ЦЛ-415 додека не беше пронајден и издигнат од морето час и половина подоцна. Во подготвеност беа фрегатата „Егеј“ и воено-транспортниот авион „Ц-130“.