Од почетокот на оваа година, во Република Српска се регистрирани шест случаи со симптоми на лептоспироза – три во Бања Лука, а преостанатите три во Добој и Фоча.
Пет пациенти со симптоми на лептоспироза биле прегледани на Клиниката за инфективни болести во Сараево во последните 24 часа, а еден бил задржан на лекување, пренесува РТРС.
Во Сараевскиот кантон е прогласена епидемија од оваа болест, а според извештаите, минатата година во Република Српска се регистрирани 15 случаи.
Лептоспирозата е акутна заразна бактериска болест, а извор на инфекција се глодари, домашни и диви животни.
Се нарекува и професионална болест бидејќи ветеринарите, месарите, рибарите, ловџиите, како и градското население кое индиректно доаѓа во контакт со животни се најподложни на болеста – заразените животни ги излачуваат бактериите во урината во надворешната средина, од каде што луѓето се инфицираат преку повреди на кожата или преку мукозните мембрани на носот, устата и очите.
Извор на инфекција може да биде и почвата, калта или контаминираната вода, додека меѓучовечкиот пренос е исклучително редок.