Саудискиот конзул ја напушти Турција неколку часа по најавата дека неговата резиденција ќе биде пребарувана во врска со исчезнувањето на новинарот Кашоги, јави турската агенција Анадолија.
Како што пренесе агенцијата, конзулот Мугамед ал Отаиби ја напуштил Турција со авион во 14 часот. Од Саудиска Арабија за сега нема коментар за неговото заминување.
Турското министерство за надворешни работи соопшти дека ќе ја пребара неговата официјална резиденција и возила кои се во сопственост на конзулатот. Не е наведено кога ќе биде тоа спроведено.
Турските форензичари го завршија претресот на саудискиот конзулат рано утрово, две недели по исчезнувањето на саудискиот новинар Џамал Кашоги.
Еден висок турски функционер рече дека полицијата за време на птретресот на саудискиот конзулат во Истанбул минатата ноќ пронашле одредени докази кои укажуваат дека Кашоги е убиен.
Турските власти и претоходно изразија сомнеж дека саудиски агенти го убиле Кашоги во конзулатот и го отстраниле неговото тело. Саудиска Арабија тие обвинувања ги нарекоа неосновани, но американските медиуми наговестуваат дека Саудијците би можеле да признаат дека Кашоги е убиен во конзулатот за време на испитување кое тргнало на лошо.