Бугарскиот претседател Румен Радев се обрати кусо пред почетокот на самитот на ЕУ и повика на солидарност, но не прецизираше на која тема.
Како и повеќето други лидери, бугарскиот претседател застана да даде куса изјава за новинарите, пред почетокот на средбата на шефовите на држави и влади на ЕУ. Тој упати изјава во која побара солидарност од ЕУ.
-Ова е многу важна средба за сите земји членки и за иднината на ЕУ, имаме огромни предизвици пред нас и треба да го најдеме најважното: балансот, и во сите фактори што влијаат врз развојот на иднината потребна ни е солидарност и да се земат предвид проблемите на секоја земја членка, изјави Радев.
Нејасно е на што се однесува оваа изјава и дали Бугарија планира вечерва да ја отвори темата за преговорите со Македонија со другите земји членки на ЕУ.
Денешниот ЕУ-самит во најголем дел е посветен на Белорусија, додека утре на маса се темите на Блискиот исток, Брегзит и Ковид-19.
Радев вечерва ќе оствари билатерална средба и со претседателот на Европскиот Парламент, Давид Сасоли.