Косовските Албанци на плоштадот Мајка Тереза во центарот на Приштина со солзи и со огномет ја дочекаа пресудата за командантот на ОВК, Рамуш Харадинај.
На центаралниот плоштад каде Алијансата за иднина на Харадинај организираше директен пренос од пресудата, во моментот на изрекување на пресудата почна огномет и се слушнаа силни извици.
Огнометот бил поголем и подолго траел од тој пред еден ден за стогодишнината од Албанија и Денот на албанското знаме.
Во текот на прославата се слушнаа и истрели од огнено оружје. Жителите на Приштина носат маици со натпис „Лидер кој си стои на зборот“ и „Чист образ“.
Советникот на Харадинај, Бесник Тахири изјави дека се презадоволни со пресудата и најави свечен пречек и вклучување на Харадинај во политичкиот живот на многу одговорно ниво.
Хашкиот трибунал го ослободи Харадинај
Харадинај, кој за време на конфликтот во Косово меѓу 1998-1999 година беше еден од командантите на Ослободителната војска на Косово (ОВК), беше обвинет за воени злосторства и злосторства против човештвото, заедно со неговите соработници Идриз Балај и Лахи Брахимај.
Судскиот совет заклучи дека Рамуш Харадинај не е виновен за здружен злосторнички потфат. Укажано е дека обвинителството не изнесе докази кои би ги потврдиле наводите дека Харадинај воопшто знаел за случувањата во логорот Јабланица.
Во април 2008 година Харадинај беше ослободен целосно од Хашкиот трибунал по сите 37 точки од обвинението поради недостиг на докази. Обвинителството на Трибуналот ја обжали пресудата, а во јуни 2010 година Апелацискиот совет делумно ја поништи. Судиите истакнаа дека за време на првичниот судски процес постоело заплашување на сведоци.
Во август 2011 година Хашкиот трибуналот почна повторен судски процес по шест од 37 точки од првичното обвинение. За време на процесот беа сослушани 12 сведоци, а сведочењата на уште 44 лица беа претставени во писмена форма. Според обвинителот Пол Роџерс за време на повторниот процес било докажано дека обвинетите биле учесници во заедничко дело, чија цел била жестоко уништување на сите противници на ОВК, претставени како шпиони.
Харадинај беше премиер на Косово од трети декември 2004 година до осми март 2005 година.