Вишиот суд во Зајечар им го продолжи притворот на Срѓан Јанковиќ и Дејан Драгијевиќ, осомничени за убиството на двегодишното девојче Данка Илиќ, за уште 30 дена. Според таа одлука нивниот притвор може да трае до 29 мај.
Осомничените се во притвор од 6 април поради опасност од бегство, можност за влијание врз сведоци и уништување или отстранување траги од извршување на кривично дело.
Во притвор е и таткото на Дејан Драгијевиќ под сомнение дека му помогнал на синот да го премести телото на убиената Данка Илиќ.
По 10-дневна потрага и детална проверка на сите индиции и информации, полицијата ги уапси Јанковиќ и Драгијевиќ од Бор, кои се осомничени дека ја удриле малата Данка со автомобил, а потоа нејзиното тело го ставиле во багажникот и го однеле во депонија.
Телото на девојчето кое исчезна на 26 март во Бањско Поле кај Бор се уште не е пронајдено.