Привремената влада на Бугарија одобри близу три и пол милиони лева (1,75 милиони евра) за обнова на манастирот „Св. Великомаченик Георги Зограф“ на Света Гора во Грција, јави дописникот на МИА од Софија.
Вршителот на должноста министер за култура Велислав Минеков информира дека ќе се сретне со игуменот на манастирот Амвросиј. Доделените пари ќе бидат наменети за обновување на Зограф по пожарот во источното крило и за изградба на пат до манастирското пристаниште Арсана.
Минеков изјави дека сега има можност да почне обновата на манастирот.
– По пожарот во источното крило, се остана само на намера и сега конечно ќе се реши проблемот со неговата реставрација и конзервација. Долго време се бараа средства. Сега има шанса да почне оваа поправка и тоа ќе се случи, рече Минеков.
Извор: МИА