Советот за безбедност на ОН синоќа ги повика двете заедници на Кипар да ги возобноват преговорите за мир на островот, кој е поделен на грчки и турски дел од 1974 година.
– Советот апелира до страните да покажат вистинска политичка волја и одговорност и да ги направат неопходните компромиси за обединување на Кипар, изјави специјалната претставничка на ОН, Елизабет Спехар по седницата на Советот за безбедност посветена на Кипар, што се одржа зад затворени врати.
Таа нагласи дека кипарските Грци и Турци треба јасно да се ангажираат со ОН и да го искористат постигнатиот напредок за решавање на кипарското прашања со создавање на федерација на две заедници.
Спехар информира дека Советот за безбедност го поздравил и именувањето на Џејн Хол Лут за консултантка на генералниот секретар на ОН, Антонио Гутереш за решавање на кипарскиот проблем. Хол Лут е висока претставничка на ОН и поранешна американска потсекретарка за национална бебзедност.
Мировните преговори за Кипар пропаднаа пред една година, а Хол Лут сега ќе има задача да утврди дали има услови за нивна обнова, поради што следната недела ќе отпатува во Никозија.
На Кипар е распоредена мировна мисија на ОН од околу 900 војници, чиј актуелен мандат истекува на 31 јули. Мисијата на Кипар ги чини ОН над 50 милиони долари годишно.