Обвинителството на Босна и Херцеговина денеска потврди дека повеќе од сто осомничени од 14 различни агенции – полицајци, адвокати, па дури и судија и обвинител – се предмет на истрага во врска со апликациите „Скај“ и „Аном“.
„Досега има повеќе од сто осомничени лишени од слобода или приведувани изминатите 16 месеци, од кои 14 се од различни полициски и агенции за спроведување на законот (ДКПТ, МВР на РС, Гранична полиција, МВР, ОСА) двајца адвокати, судија од Судот на правдата во Бјелина, поранешен советник во Министерството за безбедност на Босна и Херцеговина“, соопшти Обвинителството на БиХ.
Обвинителството потсети дека токму поради односните случаи Дисциплинскиот обвинител ја суспендираше обвинителката Дијана Кајмаковиќ.
Поднесени се две обвиненија (Далибор Раилиќ и др., Ратковиќ Саша и др.), а се очекува во наредните месеци да бидат покренати обвиненија за неколку случаи“, заклучуваат од Обвинителството на БиХ.
Последната информација што се појави во јавноста е дека е сменета шефицата на контактното место за ЕВРОПОЛ за Босна и Херцеговина, Споменка Маркуљ, а нејзината замена е поврзана со случаите „Скај“.
Извор: МИА