Повеќе од 1.500 рокери тргнаа денеска од Белград за Косово со специјална мисија. Целта на рокерите, кои се од Србија, Македонија, БиХ, Црна Гора и Русија е да им изразат поддршка на косовските Срби.
„Вечерва, откако рокерите на мотори ќе пристигнат во Косовска Митровица, ќе се одржи рок концерт. Заминавме за Косово со нашите гитари. Цел ни е да ги поддржиме и охрабриме нашите сонародници на Косово и ќе се бориме за тоа до последната капка бензин. Нашата мисија е специјална. Со патувањето рокерите сакаат да покажат дека Косово секогаш ќе биде на Србија и не е можно да биде одземено“, изјави лидерот на клубот „Харли Дејвидсон Србија“ Милич Радевиќ.
Освен гитарите, рокерите на Косово ќе однесат и лекови, кои ќе ги донираат во локалните болници, а ќе биде организирана и акција за дарување крв.
Мисијата на рокерите е поддржана и од Српската нафтена компанија НИС, која на сите учесници во акцијата им обезбедува бесплатно точење на бензин на бензиските станици на оваа компанија.